Labelu bwydydd wedi'u rhagbecynnu: rhestr cynhwysion
Yn y canllawiau
Gofynion labelu ar gyfer cynhyrchion bwyd wedi'u pecynnu, yn ymwneud yn benodol â'r rhestr cynhwysion
Mae'r canllawiau hyn ar gyfer Cymru a Lloegr
Mae'r canllawiau hyn yn ymwneud â bwyd wedi'i ragbecynnu yn unig.
Mae 'bwyd wedi'i becynnu' yn cael ei ddiffinio yn Rheoliad (UE) Rhif 1169/2011 ar ddarparu gwybodaeth am fwyd i ddefnyddwyr fel "... bwyd a'r deunydd pacio y cafodd ei roi iddo cyn ei gynnig i'w werthu, p'un a yw'r pecynnu hwnnw'n amgáu'r bwyd yn llwyr neu'n rhannol, ond beth bynnag yn y fath fodd fel na ellir newid y cynnwys heb agor neu newid y pecynnu ... ".
Nid yw'r diffiniad o ragbecynnu yn cynnwys bwyd sydd wedi'i bacio ar y safle gwerthu ar gais y defnyddiwr; ac nid yw ychwaith yn cynnwys bwyd sy'n cael ei werthu o'r fangre lle cafodd ei bacio neu o stondin symudol neu gerbyd a ddefnyddir gan y paciwr (y cyfeirir ato fel ' wedi'i ragbecynnu i'w werthu'n uniongyrchol ').
Rhestr o gynhwysion
Bydd angen rhestr cynhwysion ar gyfer y rhan fwyaf o fwydydd wedi'u rhagbecynnu.
Mae angen i'r rhestr gael ei harwain gan y gair ' cynhwysion ', yna rhestr o'r holl gynhwysion mewn trefn ddisgynnol yn ôl pwysau yn ystod y cyfnod cynhyrchu mewn dysgl gymysgu. Mae hyn yn golygu bod y rhestr yn mynd o'r cynhwysion hynny oedd yn pwyso fwyaf i'r cynhwysion hynny oedd yn pwyso leiaf pan oedden nhw'n cael eu cynnwys yn y cynnyrch. Mae rhai eithriadau i hyn.
Gellir rhoi perlysiau, sbeisys, ychwanegion, melysyddion ac unrhyw gynhwysyn arall sy'n gwneud llai na 2% o'r cynnyrch gorffenedig ar ddiwedd y rhestr.
Cynhwysion cyfansawdd
Mae cynhwysion cyfansawdd yn gynhwysion sy'n cynnwys mwy nag un cynhwysyn. Rhaid i holl gydrannau'r cynhwysyn cyfansawdd gael eu datgan mewn cromfachau yn union ar ôl i'r cynhwysyn cyfansawdd ymddangos yn y rhestr gynhwysion; dylai'r rhestr fod yn nhrefn pwysau - er enghraifft, Toad in the hole: ' Cynhwysion: cytew (dwr, blawd gwenith, wy cyfan, wy gwyn, olew had rêp, powdr llaeth sgim, halen, emynwr: lecithin soia) '.
Dylai unrhyw ychwanegion sydd yn y cynhwysyn cyfansawdd gael eu cyflwyno ar ddiwedd y rhestr mewn cromfachau yn hytrach nag ar ddiwedd y prif restr cynhwysion.
Nid oes angen i unrhyw gynhwysyn cyfansawdd sydd â chyfansoddiad sy'n cael ei reoli gan ddeddfwriaeth (siocled, jam, mêl ac ati) sy'n cynnwys llai na 2% o'r cynnyrch gorffenedig gael ei rannu'n gydrannau.
Dwr
Os yw'r dwr yn gwneud i fyny 5% neu fwy o'r cynnyrch gorffenedig, bydd angen i chi ei gynnwys yn y rhestr cynhwysion.
Nid yw hyn yn berthnasol i ddwr y bwriedir ei ddraenio i ffwrdd (tiwna mewn heli, er enghraifft) neu os defnyddiwyd dwr i ailhydyrru cynhwysyn sych neu powdr.
Ychwanegion
Rhaid cynnwys ychwanegion yn y rhestr cynhwysion fel unrhyw gynhwysyn arall. Os yw ychwanegyn yn ffurfio mwy na 2% o'r cynnyrch gorffenedig, rhaid ei ddatgan yn nhrefn pwysau ddisgynnol fel uchod. Ar gyfer ychwanegion sy'n ffurfio llai na 2% o'r cynnyrch gorffenedig, mae'n arfer gorau i'w grwpio i gyd gyda'i gilydd ar ddiwedd y rhestr.
Er efallai nad ydych yn defnyddio ychwanegion yn fwriadol, efallai eu bod yn bresennol yn y cynhwysion rydych yn eu defnyddio. Dylech edrych yn ofalus ar unrhyw ddeunydd pacio neu ddogfennau sy'n dod gyda'ch cynhwysion a sicrhau bod unrhyw ychwanegion sydd ynddynt yn cael eu datgan.
Ffurf yr ychwanegion a ddatganwyd
Mae'n rhaid i chi ddatgan y categori ychwanegyn (yr hyn y mae'n ei wneud) ac yna enw'r ychwanegyn a/neu rif E yr ychwanegyn. Cewch ddefnyddio pa ddull bynnag sydd orau gennych.
Er enghraifft:
- cadwolyn: asid sorbig
- cadwolyn: E200
- cadwolyn: asid sorbig E200
Mae wefan yr Asiantaeth Safonau Bwyd (FSA) yn cynnwys y rhestr o ychwanegion cymeradwy a rhifau E.
Os yw eich cynnyrch yn cynnwys sawl ychwanegyn o'r un categori, bydd angen i chi ddatgan y categori unwaith yn unig ac yna rhestru pob ychwanegiad o'r categori hwnnw.
Os yw ychwanegyn yn ffitio i gategorïau lluosog, dewiswch y prif reswm dros ei gynnwys a'i ddatgan fel y categori hwnnw.
Efallai na fyddwch yn ystyried bod rhai cynhwysion yn ychwanegion; fodd bynnag, os yw cynhwysyn wedi'i gynnwys at 'bwrpas technolegol' (hynny yw, ar gyfer yr hyn y mae'n ei wneud yn hytrach na sut mae'n blasu neu'r maetholion y mae'n eu darparu) yna dylech ei ddatgan fel ychwanegyn. Er enghraifft, byddai soda pobi yn cael ei ddatgan fel 'Asiant codi: sodiwm bicarbonad.'
Os ydych yn enwi'r ychwanegyn yn hytrach na defnyddio ei rif E rhaid i chi roi'r enw yn llawn, peidiwch â'i dalfyrru - er enghraifft, 'monosodiwm glutamate' yn hytrach na 'MSG'.
Lliwiau
Mae lliwiau yn fath o ychwanegyn ac maent yn dilyn y rheolau uchod. Os ydych yn defnyddio rhai lliwiau yn eich bwyd mae angen i chi gynnwys rhybuddion penodol.
Am fanylion llawn, gweler 'Lliwiau mewn bwyd'.
Melysyddion
Math o ychwanegyn yw melysyddion ac maent yn dilyn y rheolau uchod. Trowch at restr yr ASB o ychwanegion cymeradwy a rhifau E ar gyfer melysyddion y gellir eu defnyddio mewn bwyd (y cyfeirir atynt fel ' melysyddion a ganiateir ').
Aspartame
Os oes aspartame yn y cynnyrch rhaid i chi ddatgan y canlynol ar y label: ' yn cynnwys ffynhonnell ffenylalîn '.
Os mai dim ond y rhif E rydych chi wedi'i ddatgan yn hytrach na'r enw ' aspartame ' yn y rhestr cynhwysion, bydd angen y datganiad canlynol arnoch yn hytrach na'r un uchod: ' yn cynnwys aspartame (ffynhonnell ffenylalsanîn) '.
Poliolau
Math o felysydd heb siwgr sy'n seiliedig ar garbohydradau yw poliol. Os yw eich cynnyrch yn cynnwys mwy na 10% o boliolau sy'n cael eu hychwanegu, rhaid i chi ddatgan: ' gall gormod o ddefnydd gynhyrchu effeithiau laxin '.
Cynhwysir melysyddion ar y rhestr ychwanegion a gymeradwyir o dan eu henw yn hytrach na'u math; fel y cyfryw, bydd angen i chi ymchwilio i weld a yw'r melysyddion rydych yn eu defnyddio yn boliolau.
Bwydydd sydd ddim angen rhestr cynhwysion
Nid oes angen rhestr cynhwysion ar y cynhyrchion canlynol:
- ffrwythau a llysiau ffres, cyfan a heb eu pilio, (gan gynnwys tatws)
- dwr carbonedig (sy'n datgan ei fod yn garbonedig)
- finegr sy'n cynnwys dim cynhwysion ychwanegol
- caws, menyn, llaeth wedi'i eplesu a hufen heb unrhyw gynhwysion ychwanegol (heblaw'r rhai sydd eu hangen i'w gwneud, fel diwylliannau bacterial, halen yn achos caws, ac ati)
- bwydydd sy'n cynnwys un cynhwysyn ac enw'r cynhwysyn yn cael ei nodi yn enw'r cynnyrch
- diodydd gyda chryfder alcoholig yn fwy na 1.2%
Rhaid i gynhyrchion sydd heb restr cynhwysion ddal i amlygu presenoldeb cynhwysion alergenig. I gael rhagor o wybodaeth, gweler 'Alergenau bwyd ac anoddefgarwch'.
Gwybodaeth pellach
Mae llawer o ofynion ar gyfer bwyd wedi'i ragbecynnu. Gweler ein canllawiau eraill ar y pwnc:
Cosbau
Gall methu â chydymffurfio â chyfraith safonau masnach arwain at gamau gorfodi ac at gosbau, a allai gynnwys dirwy a/neu garchar. I gael rhagor o wybodaeth gweler 'Safonau masnach: pwerau, gorfodi a chosbau'.
Deddfwriaeth allweddol
Deddf Diogelwch Bwyd 1990
Rheoliad (EC) Rhif 1332/2008 ar ensymau bwyd
Rheoliad (EC) Rhif 1333/2008 ar ychwanegion bwyd
Rheoliad (EC) Rhif 1334/2008 ar gyflasynnau a chynhwysion bwyd penodol ac iddynt briodweddau cyflasyn i'w defnyddio mewn bwydydd ac arnynt
Rheoliad (UE) Rhif 1169/2011 ar ddarparu gwybodaeth am fwyd i ddefnyddwyr
Rheoliadau Ychwanegion, Cyflasynnau, Ensymau a Thoddyddion Echdynnu Bwyd (Cymru) 2013
Rheoliadau Ychwanegion, Cyflasynnau, Ensymau a Thoddyddion Echdynnu Bwyd (Lloegr) 2013
Rheoliadau Gwybodaeth am Fwyd 2014
Rheoliadau Gwybodaeth am Fwyd (Cymru) 2014
Adolygwyd/Diweddarwyd ddiwethaf: Mawrth 2021
Yn y diweddariad hwn
Dim newidiadau mawr
Noder
Bwriedir y wybodaeth hon fel canllaw yn unig; dim ond y llysoedd all roi dehongliad awdurdodol o'r gyfraith.
Efallai na fydd dolenni 'deddfwriaeth allweddol' y canllaw ond yn dangos fersiwn wreiddiol y ddeddfwriaeth, er bod dolenni ar wahân i rywfaint o ddeddfwriaeth ddiwygiedig sy'n uniongyrchol gysylltiedig chynnwys y canllawiau. Gellir dod o hyd i wybodaeth ar ddiwygiadau i ddeddfwriaeth y ar y tab 'Mwy o Adnoddau' ym mhob dolen.
Am fwy o wybodaeth, cysylltwch â'r gwasanaeth defnyddwyr Cyngor ar Bopeth, sy'n darparu cyngor cyfrinachol a diduedd ar faterion defnyddwyr yn rhad ac am ddim. Ewch i wefan Cyngor ar Bopeth neu ffoniwch linell gymorth defnyddwyr Cyngor ar Bopeth ar 03454 040505.
© 2021 itsa Ltd.