Siopau ail-lenwi
Yn y canllawiau
Mae busnesau sy'n gwerthu cynnyrch mewn cynwysyddion a ddarperir gan ddefnyddwyr yn ddarostyngedig i amrywiaeth o ofynion cyfreithiol
Mae'r canllawiau hyn ar gyfer Cymru a Lloegr
Bu ymchwydd yn ddiweddar yn nifer y siopau sy'n gwerthu nwyddau i ddefnyddwyr mewn potiau, jariau, poteli a chynwysyddion eraill a ddarperir gan y defnyddwyr eu hunain.
Mae nifer o ganllawiau sy'n ymdrin â'r arferion busnes hyn a'r mathau o nwyddau sy'n cael eu gwerthu, a dylai perchnogion busnes ymgyfarwyddo â hwy. Fodd bynnag, efallai na fydd y rhain i gyd yn ganllawiau sy'n berthnasol i'ch busnes penodol chi ac argymhellir eich bod yn pori'r wefan ymhellach.
Bwyd
Gwerthir bwyd mewn siopau ail-lenwi mewn modd a elwir yn 'ddim wedi'i ragbecynnu', ac er bod ganddo lai o ofynion labelu na bwyd wedi'i ragbecynnu, mae'n rhaid iddo ddarparu gwybodaeth benodol i ddefnyddwyr o hyd. Gweler 'Labelu bwydydd nad ydynt wedi'u rhagbecynnu' i gael rhagor o wybodaeth.
Rhaid i chi sicrhau bod y cynwysyddion rydych yn eu gwerthu o'ch cynhyrchion bwyd, yn ogystal ag unrhyw gynwysyddion llai yr ydych yn eu gwerthu i ddefnyddwyr nad oes ganddynt eu cynnyrch eu hunain, yn addas i'w defnyddio at ddibenion bwyd. Ceir rhagor o wybodaeth yn 'Deunyddiau cyswllt bwyd'. Fodd bynnag, nid ydych yn gyfrifol am sicrhau bod y cynwysyddion y mae defnyddwyr yn eu darparu eu hunain yn addas.
Diogelwch cynnyrch
Os ydych yn gwerthu siampwau, lleithyddion, ac ati, mae angen i chi sicrhau bod yr hyn yr ydych yn ei werthu yn ddiogel ac wedi'i labelu'n gywir. Gweler 'Cynhyrchion cosmetig'.
Ar gyfer cynhyrchion sydd heb eu rhagbecynnu, efallai na fydd yn bosibl labelu'r cynhyrchion eu hunain; o dan yr amgylchiadau hyn, gellir rhoi gwybodaeth am ragofalon a chynhwysion ar daflenni, labeli, tagiau neu gardiau.
Pwysau a mesurau
Mae pwyso a mesur y cynhyrchion rydych chi'n eu gwerthu yn dod o dan gyfraith safonau masnach.
Rhaid i bwysau'r cynhyrchion a werthir i gynwysyddion ail-lenwi'r cwsmeriaid eu hunain fod mewn meintiau metrig – gramau neu gilogramau - a rhaid penderfynu arnynt gan ddefnyddio offer a gymeradwyir yn gyfreithiol. Mae gofynion penodol iawn ar gyfer y math o offer y mae'n rhaid ei ddefnyddio, a gellir dod o hyd i'r manylion yn 'Offer pwyso ar gyfer defnydd cyfreithiol'.
Mae'n bwysig pennu pwysau'r cynhyrchion a werthir cyn eu rhoi yng nghynhwysydd y cwsmer; bydd hyn yn sicrhau mai dim ond pwysau'r cynnyrch sy'n cael ei godi. Fel arall, gellir pwyso cynhwysydd y cwsmer cyn ei lenwi fel y gellir tynnu pwysau'r cynhwysydd o'r cyfanswm, neu gellir defnyddio'r swyddogaeth 'efryn' ar offer pwyso i dynnu pwysau cynhwysydd o'r broses bwyso.
Os caiff cynhyrchion hylifol eu gwerthu yn ôl cyfaint, rhaid defnyddio cyfarpar sydd wedi'i gymeradwyo'n gyfreithiol ac sydd wedi'i stampio gan y Llywodraeth, a rhaid i'r cynhyrchion gael eu gwerthu mewn mililitrau neu litrau.
Cysylltwch â'ch gwasanaeth safonau masnach lleol os oes angen mwy o gyngor a gwybodaeth am yr offer pwyso a mesur priodol, neu am y gofynion ar gyfer mesur cynhyrchion penodol.
Prisio
Mae prisio hefyd yn bwysig, wrth gwrs, ac mae manylion y gofynion i'w gweld yn 'Darparu gwybodaeth am brisiau'. Mae'r canllaw hwn hefyd yn cynnwys rhestr o'r unedau y mae'n rhaid gwerthu cynhyrchion ynddynt - er enghraifft, pris fesul 100g.
Cosbau
Gall methu â chydymffurfio â chyfraith safonau masnach arwain at gamau gorfodi ac at gosbau, a all gynnwys dirwy a/neu garchar. I gael rhagor o wybodaeth, gweler 'Safonau masnach: pwerau, gorfodi a chosbau '.
Ddeddfwriaeth allweddol
Deddf Pwysau a Mesurau 1985
Deddf Diogelwch Bwyd 1990
Rheoliadau Offer Pwyso (Peiriannau Pwyso An-Awtomatig) 2000
Gorchymyn Marcio Prisiau 2004
Rheoliad yr UE (EC) Rhif 1935/2004 ar ddeunyddiau ac eitemau y bwriedir iddynt ddod mewn cysylltiad â bwyd
Rheoliad yr UE (EC) Rhif 1895/2005 ar gyfyngu ar y defnydd o ddeilliadau epocsi penodol mewn deunyddiau ac eitemau y bwriedir iddynt ddod mewn cysylltiad â bwyd
Rheoliad yr UE (EC) Rhif 2023/2006 ar arfer gweithgynhyrchu da ar gyfer deunyddiau ac eitemau y bwriedir iddynt ddod mewn cysylltiad â bwyd
Rheoliadau Diogelu Defnyddwyr Rhag Masnachu Annheg 2008
Rheoliad yr UE (EC) Rhif 450/2009 ar ddeunyddiau ac eitemau gweithredol a deallus y bwriedir iddynt ddod mewn cysylltiad â bwyd
Rheoliad yr UE (EC) Rhif 1223/2009 ar gynhyrchion cosmetig
Rheoliad UE (UE) Rhif 10/2011 ar ddeunyddiau ac eitemau plastig y bwriedir iddynt ddod mewn cysylltiad â bwyd
Rheoliad yr UE (eu) Rhif 1169/2011 ar ddarparu gwybodaeth am fwyd i ddefnyddwyr
Rheoliadau Deunyddiau ac Eitemau mewn Cysylltiad â Bwyd (Lloegr) 2012
Rheoliadau Deunyddiau ac Eitemau mewn Cysylltiad â Bwyd (Cymru) 2012
Rheoliadau Gorfodi Cynhyrchion Cosmetig 2013
Rheoliadau Gwybodaeth am Fwyd 2014
Rheoliadau Gwybodaeth am Fwyd (Cymru) 2014
Rheoliadau Offer Pwyso An-awtomatig 2016
Canllawiau newydd: Chwefror 2020
Noder
Bwriedir y wybodaeth hon fel canllaw yn unig; dim ond y llysoedd all roi dehongliad awdurdodol o'r gyfraith.
Efallai na fydd dolenni 'deddfwriaeth allweddol' y canllaw ond yn dangos fersiwn wreiddiol y ddeddfwriaeth, er bod dolenni ar wahân i rywfaint o ddeddfwriaeth ddiwygiedig sy'n uniongyrchol gysylltiedig chynnwys y canllawiau. Gellir dod o hyd i wybodaeth ar ddiwygiadau i ddeddfwriaeth y ar y tab 'Mwy o Adnoddau' ym mhob dolen.
Am fwy o wybodaeth, cysylltwch â'r gwasanaeth defnyddwyr Cyngor ar Bopeth, sy'n darparu cyngor cyfrinachol a diduedd ar faterion defnyddwyr yn rhad ac am ddim. Ewch i wefan Cyngor ar Bopeth neu ffoniwch linell gymorth defnyddwyr Cyngor ar Bopeth ar 03454 040505.
© 2021 itsa Ltd.