Cyngor Sir Ynys Môn

Mae’r Gronfa Datblygu Cynaliadwy - CDC yn gyfle ardderchog i geisio am gymhorthdal grant ar gyfer prosiectau amgylcheddol sy’n arloesol a chynaliadwy, ac sy’n rhai y bydd cymunedau lleol yn ymwneud â hwy mewn Ardaloedd o Harddwch Naturiol Eithriadol (AHNE). Mae AHNE yn dirweddoedd sy’n genedlaethol bwysig, wedi eu dynodi oherwydd eu harddwch golygfaol ysblennydd.

Mae'r Gronfa Datblygu Cynaliadwy (CDC) yn gyfle gwych i wneud cais am gyllid grant tuag at brosiectau arloesol, cynaliadwy ac amgylcheddol sy'n cynnwys ac yn gwella cymunedau lleol yn y Tirwedd Cenedlaethol (AHNE).

Mae Tirweddau Cenedlaethol, a elwid gynt yn Ardaloedd o Harddwch Naturiol Eithriadol (AHNE), yn dirweddau o arwyddocâd cenedlaethol sy'n cael eu cydnabod am eu harddwch golygfaol eithriadol.

• Grwpiau cymunedol, gwirfoddol neu bartneriaethau.
• Cynghorau tref a chymuned.
• Awdurdodau lleol.
• Y sector breifat (am brosiectau sydd o ddiddordeb cyhoeddus ehangach).
• Unigolion (am brosiectau sydd o ddiddordeb cyhoeddus ehangach)

Prosiectau sy'n bodloni amcanion y cynllun a'r AHNE, sef:

• cadw a gwella harddwch naturiol yr AHNE, gan gynnwys yr amgylchedd adeiledig
• hyrwyddo ffurfiau cynaliadwy o ddatblygiad cymdeithasol ac economaidd a fydd yn helpu i warchod a gwella'r AHNE
• hyrwyddo lles economaidd a chymdeithasol cymunedau lleol
• hyrwyddo mwynhad tawel o'r AHNE

Er mwyn i sefydliadau dderbyn arian, rhaid iddynt gael cyfansoddiad ffurfiol a chyfrif banc.

Ni ddylai prosiectau ddefnyddio unrhyw gyllid arall gan Lywodraeth Cymru fel cyllid cyfatebol.

Dylai'r prosiectau gyflawni'r dibenion canlynol, sef:

• archwilio ffyrdd arloesol o gyfrannu at y cyfleoedd a'r heriau a nodir yn agenda gyfredol Llywodraeth Cymru ar gyfer yr amgylchedd a chynaliadwyedd, gan gynnwys, yn benodol, Deddf Llesiant a Chenedlaethau'r Dyfodol (Cymru) 2015 a Deddf yr Amgylchedd (Cymru) 2016.
• cynorthwyo i fynd i'r afael â'r argyfyngau colli bioamrywiaeth a newid hinsawdd. Er mwyn rhoi blaenoriaeth i'r ddau argyfwng amgylcheddol hyn, rhaid neilltuo 60% o'r cyllid ar gyfer prosiectau y mae eu prif nod yn mynd i'r afael â cholli bioamrywiaeth a newid hinsawdd a lliniaru yn eu herbyn.
• i feithrin capasiti mewn cymunedau lleol, ac i ddatblygu a chefnogi prosiectau cymunedol sy'n hyrwyddo amcanion datblygu cynaliadwy.
• i greu mwy o ymwybyddiaeth a dealltwriaeth o gynaliadwyedd ymhlith trigolion ac ymwelwyr, a hwyluso newid ymddygiad cadarnhaol trwy gyfathrebu a hyrwyddo'r prosiectau a'r gronfa.
• i gyflawni a hyrwyddo dibenion y Tirwedd Cenedlaethol a'r amcanion fel y'u nodir yng Nghynllun Rheoli AHNE Ynys Môn.

1. Cwblhewch ffurflen gais a'i chyflwyno.
2. Bydd eich ffurflen gais yn cael ei sgorio ar y categorïau a grybwyllir yn y cais gan ddau swyddog o'r Tîm Cefn Gwlad a Tirwedd Cenedlaethol.
3. Byddwch yn derbyn adborth gan y swyddogion.
4. Os yw eich cais yn bodloni'r meini prawf, yna caiff ei gyflwyno i Fwrdd y Gronfa Datblygu Cynaliadwy, a fydd yn trafod eich cais ac a yw'n bodloni'r meini prawf perthnasol.
5. Byddwch yn cael gwybod a yw eich cais yn llwyddiannus.
6. Gall eich prosiect ddechrau.

• Bydd y cynllun yn darparu grantiau prosiectau; grantiau rheoli i gefnogi costau staff a grantiau datblygu i ddarparu catalydd ar gyfer gweithredu neu bartneriaethau newydd.
• Rhaid i brosiectau fod yn newydd ac ni all cyllid gefnogi prosiectau sydd eisoes wedi cychwyn, oni bai bod y cais ar gyfer cyfnod newydd neu elfen benodol.
• Ni fwriedir i gyllid gynnal gwasanaethau neu brosiectau parhaus, er enghraifft digwyddiadau, seilwaith ac amwynderau.
• Ni fydd unrhyw brosiect sengl yn cymryd mwy na £25,000 o'r gronfa gyfan mewn unrhyw flwyddyn.
• Bydd hyd at 75% ar gael ar gyfer prosiectau cymwys.
• Disgwylir i ymgeiswyr ddarparu o leiaf 25% o gyfanswm costau'r prosiect, naill ai o'u cronfeydd eu hunain neu gronfeydd eraill.