Cyngor Sir Ynys Môn

Gall cwyn i Gyngor Sir Ynys Môn fod ynglŷn â:

• y cyngor ei hun
• person sy'n gweithredu ar ran y cyngor
• partneriaeth sydd gan y cyngor â pherson neu sefydliad arall

Diffiniad o gwyn

Mae cwyn :

• yn fynegiant o anfoddhad neu bryder
• ar lafar neu’n ysgrifenedig neu wedi ei wneud drwy unrhyw ddull cyfathrebu arall
• wedi ei wneud gan un aelod o’r cyhoedd neu ragor
• yn ymwneud â’r hyn a wnaed neu’r hyn na wnaed gan y Cyngor
• yn ymwneud â safon gwasanaeth a ddarperir

Beth nad yw'n gwyn

Nid yw cwyn:

• adrodd am broblem am y tro cyntaf (er enghraifft golau stryd diffygiol)
• cais dechreuol am wasanaeth, fel adrodd am dipio am y tro cyntaf
• cais cyntaf am wybodaeth, neu eglurhad am bolisïau neu benderfyniadau Cyngor Sir Ynys Môn
• cynrychiolaeth am rinweddau polisi penderfyniadau’r Cyngor Sir Ynys Môn (er enghraifft, gosod taliadau rhent)
• herio ‘penderfyniadau a wnaed yn briodol’ lle mae hawl statudol i apelio
• mecanwaith ar gyfer lobio neu ffordd o geisio newid deddfwriaethol
• gwneud cwyn am sŵn
• adrodd am gasgliad gwastraff biniau a fethwyd
• adrodd am y tro cyntaf am ddraeniau wedi blocio
• adrodd am broblem ar y priffyrdd, megis tyllau yn y ffordd, gwaith ffordd, palmantau ac ati
• hysbysiad cosb benodedig neu hysbysiad tâl
• cais dan Ddeddf Rhyddid Gwybodaeth 2000
• cwyn sydd wedi cael ei ymchwilio’n flaenorol dan y weithdrefn gwyno hon, neu weithdrefn flaenorol
• cwyn sy’n cael ei ymchwilio, neu sydd wedi cael ei ymchwilio gan Ombwdsmon Gwasanaethau Cyhoeddus Cymru

Polisi cwynion

Mae gan Gyngor Sir Ynys Môn bolisi cwynion corfforaethol .

Cwyn cyffredinol, ymholiad neu sylw 

Fel arfer, gellir delio â chwynion ar unwaith drwy gael gair â'r person sy'n darparu'r gwasanaeth. Gallai hyn fod yn dderbynnydd, staff yn y ganolfan hamdden leol, gyrrwr fan neu weithwyr ffordd.

Os oes gennych gŵyn gyffredinol, ymholiad neu sylw am Gyngor Sir Ynys Môn neu am wasanaethau’r cyngor, llenwch ein ffurflen ar-lein.

Gwneud cwyn swyddogol

Os na ellir datrys eich problem yn y fan a’r lle, y ffordd gyflymaf o wneud cwyn swyddogol yw ei chofnodi ar-lein.

Gallwch hefyd wneud cwyn swyddogol:

• dros y ffôn ar 01248 752 588
• gan ysgrifennu at y Swyddog Cwynion, Adain Gyfreithiol, Cyngor Sir Ynys Môn, Swyddfeydd y Cyngor, Llangefni, Ynys Môn, LL77 7TW

Mae copïau o’r ffurflenni ar pamffledi gwybodaeth ar gael yn holl adeiladau’r cyngor.

Gwasanaethau cymdeithasol 

Mae gan y gwasanaethau cymdeithasol weithdrefn adrannol statudol.

Adran addysg

Cwynion ynglŷn ag ysgolion

Ni allwn ymateb i gwynion am ysgolion unigol. Mae Deddf Addysg 2002 yn ei gwneud yn ofynnol i gyrff llywodraethu bob ysgol a gynhelir yng Nghymru sefydlu gweithdrefnau ar gyfer ymdrin â chwynion gan rieni, disgyblion, staff, llywodraethwyr ac aelodau o’r gymuned leol.

Bydd gan yr ysgol bolisi/gweithdrefn gwynion ar gael ar wefan yr ysgol neu drwy gysylltu â’r ysgol.
Yn y lle cyntaf, dylech drafod y cwyn â’r pennaeth, a fydd hefyd yn gallu rhoi mwy o gyngor i chi ynglŷn â threfn gwyno’r ysgol. Mae’n rhaid i unrhyw bolisi cwynion ysgol gydymffurfio â chanllawiau Llywodraeth Cymru (Gweithdrefnau Cwyno Cyrff Llywodraethu Ysgolion: Cylchlythyr 011/2012), sy’n weithdrefn tri cham:

Cam A

Os oes gennych bryder, yn aml gallwch ei ddatrys yn gyflym drwy siarad â'r pennaeth. Dylech ddisgwyl ymateb o fewn 10 diwrnod ysgol ond os nad yw hyn yn bosib, dylai'r ysgol gytuno ar amserlen ddiwygiedig gyda chi. Bydd y person sy'n goruchwylio eich cwyn yn rhoi gwybod i chi am unrhyw ddiweddariadau.

DS Os yw'r gŵyn am y pennaeth yna dylid rhoi eich cwyn yn ysgrifenedig at gadeirydd y llywodraethwyr yn uniongyrchol gyda chyfeiriad yr ysgol arni.

Cam B

Os credwch nad yw’ch cwyn gwreiddiol wedi’i datrys, neu fod yr ysgol heb ymdrin â hi’n briodol, dylech wneud eich cwyn yn ysgrifenedig i’r pennaeth.

Cam C

Ni ddylid mynd ymlaen i Gam C dim ond mewn sefyllfaoedd eithriadol, gan y dylai fod modd datrys y rhan helaeth o gwynion yng Ngham B. Fodd bynnag, os ydych chi’n dal o’r farn na ddeliwyd yn deg â’ch cwyn, dylech ysgrifennu at gadeirydd y llywodraethwyr, gan ddefnyddio cyfeiriad yr ysgol, ac esbonio’ch rhesymau dros ofyn i bwyllgor cwynion y corff llywodraethol ystyried eich cwyn. Ni fydd rhaid i chi ysgrifennu holl fanylion eich cwyn eto.

Pwyllgor cwynion y corff llywodraethol sy’n penderfynu’n derfynol ar bob cwyn.

Cwynion yn ymwneud â’r iaith Gymraeg

Os hoffech wneud cwyn yn ymwneud â chydymffurfiaeth y cyngor â safonau'r Gymraeg neu fethiant ar ran y cyngor i ddarparu gwasanaeth dwyieithog, defnyddiwch y weithdrefn hon, os gwelwch yn dda. 

Mae gennych hefyd hawl i gyfeirio unrhyw gwynion sy'n ymwneud â'r iaith Gymraeg yn uniongyrchol at Gomisiynydd y Gymraeg.

• Ombwdsman Cymru - dolen allanol yn agor mewn tab newydd