Waeth beth yr ydych yn dymuno ei wneud ar ôl gadael gofal, bellach mae Cyngor Sir Ynys Môn yn cynnig cymorth a chefnogaeth i chi gyflawni eich nod mewn bywyd.
Er mwyn gwneud a chyflawni pethau yn eich bywyd, bydd angen i chi wneud y penderfyniadau sy’n iawn i chi. Efallai bod gennych syniad o ba fath o swydd neu yrfa sy’n apelio atoch. Yn ystod y blynyddoedd nesaf, bydd angen i chi wneud penderfyniadau ynghylch pethau megis:
- mynd i goleg
- gadael ysgol
- rhywle i fyw
- cofrestru gyda meddyg
Hefyd bydd gennych obeithion a dyheadau y byddwch yn dymuno eu gwireddu yn y dyfodol. Efallai y byddent yn cynnwys:
- dysgu gyrru
- ennill cymwysterau a dysgu sgiliau
- dod o hyd i waith ac ennill cyflog
- cael ty eich hun
Mae’r Ddeddf Gadael Gofal yn cydnabod bod pobl ifanc yn gyffredinol, gan gynnwys pobl mewn gofal, angen cefnogaeth i’w cynorthwyo ar eu taith trwy fywyd. O hyn ymlaen bydd pobl ifanc sy’n gadael gofal yn cael y gefnogaeth honno.
Yn fuan ar ôl eich pen blwydd yn bymtheg byddwch yn cyfarfod â’ch Gweithiwr Ôl-Ofal a fydd yn aelod o Dîm Plant a Theuluoedd Gwasanaethau Cymdeithasol Ynys Môn. Gallwch ofyn i rywun arall fod yn gynghorydd i chi ond, pwy bynnag a gaiff ei benodi, bydd yn eich annog i barhau i dderbyn cefnogaeth ffrindiau ac oedolion eraill yr ydych yn eu hadnabod.
Rôl y gweithiwr fydd gwrando ar yr hyn sydd gennych i’w ddweud a bod yn gyswllt swyddogol i ba bynnag gymorth a chefnogaeth yr ydych ei angen i wneud penderfyniadau am eich dyfodol.
Os ydych yn dymuno rhagor o wybodaeth gallwch siarad â’ch Gweithiwr Cymdeithasol, Gofalwr Maeth neu’r Tîm Ôl-Ofal y Gwasanaethau Cymdeithasol neu wrth galw un o swyddogion Teulu Mon.